Kryeministri Edi Rama do të zbulojë kabinetin e ri qeverisës më 11 shtator, në një mbledhje të rëndësishme të Asamblesë Socialiste. Ky kabinet, i katërti nën drejtimin e Ramës, pritet të jetë një kombinim i figurave teknike me fytyra të reja, që nuk kanë dosje problematike në SPAK. Kjo ka vënë në ethe ministrat aktualë, pasi një pjesë e madhe e tyre po hetohen nga Prokuroria e Posaçme.
Ministrat me dosje të hapura
Belinda Balluku – Ministrja e Infrastrukturës hetohet për tendera dhe koncesione me vlerë miliona euro, siç është afera e Tunelit të Llogarasë, e cila, sipas burimeve, po shkon drejt fundit. Ajo dyshohet se ka favorizuar një kompani fiktive, duke i shkaktuar buxhetit të shtetit një dëm prej 50 milionë eurosh.
Ulsi Manja – Ministri i Drejtësisë ndodhet në një pozicion delikat, pasi emri i tij është përmendur në denoncime për manipulime elektorale dhe dyshohet se ka dalë në përgjimet e programit SKY.
Ogerta Manastirliu – Ministrja e Arsimit po hetohet për tendera të dyshimtë gjatë kohës që drejtonte Ministrinë e Shëndetësisë. Ajo ka dëshmuar në SPAK për aferat e sterilizimit dhe laboratorëve, të cilat i kanë shkaktuar buxhetit të shtetit dëme të mëdha.
Arbjan Mazniku – Ish-zv.kryebashkiaku i Tiranës është thirrur disa herë në SPAK dhe shtëpia e tij është kontrolluar nga BKH. Ai dyshohet për favorizime në tendera dhe konflikt interesi gjatë kohës që ishte në Bashki.
Taulant Balla – Ministri i Marrëdhënieve me Parlamentin po hetohet për aferën “Toyota Yaris”, një çështje që ka përfshirë edhe autoritetet belge. Emri i tij është përmendur gjithashtu në përgjimet e SKY ECC, duke e bërë pozicionin e tij të pasigurt.
Mirela Kumbaro – Ministrja e Mjedisit hetohet për abuzime me pasuritë natyrore dhe një skandal me kontrabandën e mbetjeve toksike. Dyshohet se ajo ka dhënë licenca të paligjshme, duke shkaktuar dëme financiare dhe mjedisore.
Pirro Vëngu – Ministri i Mbrojtjes po hetohet për një koncesion të dyshimtë në Portin e Durrësit, të firmosur kur ishte drejtor i APD-së. Ai dyshohet se favorizoi një kompani malteze, duke i ngarkuar kostot e pajisjeve Autoritetit Portual.
Përveç këtyre, flitet se emrat e ministrave Ervin Hoxha dhe Petrit Malaj nuk janë më në listën e kryeministrit. Mbetet të shihet nëse kryeministri Rama do të zgjedhë të largojë nga kabineti i ri ministrat që kanë probleme me SPAK-un.