Emri i Sadia Khan po përmendet në çdo cep të rrjeteve sociale.
Trajnerja e marrëdhënieve, që ndër vite e ka ndërtuar markën e saj si “The Sadia Psychology”, sot është kthyer në figurën më të përfolur për shkak të një skandali që përfshin tradhti, voice notes të rrjedhura dhe akuza për mashtrim financiar.
Sadia, që u mëson grave dhe burrave se si të ndërtojnë marrëdhënie të shëndetshme dhe të bëhen “high-value”, është vënë nën mikroskop pas një serie publikimesh në TikTok e Instagram, ku u ekspozuan fragmente zëri dhe mesazhe të saj private. Pikërisht aty nisi rrëmuja: në një voice note dëgjohet duke thënë fjalë tronditëse, që ranë ndesh me çdo gjë që ajo vetë ka predikuar për vite me radhë.
“Unë mund ta kënaq partnerin tënd çdo ditë që të dua, madje edhe ditën e martesës së saj ose ditëlindjen e saj…”, dëgjohet zëri i saj. Fjali të tilla, të cilat në kontekstin e pretendimeve për lidhje me një burrë të fejuar, ndezën menjëherë debatin publik.
Në mesazhe të publikuara, ajo e quan veten “side chick”, duke shtuar se “në Dubai, gratë mund të zgjedhin kë të duan”. Për shumëkënd, ky ishte konfirmimi i një mentaliteti të papajtueshëm me figurën e “mentores së dashurisë” që Sadia kishte shitur për vite. Ironia është therëse: gruaja që predikonte besnikëri dhe etikë në marrëdhënie, akuzohet se vetë ka luajtur rolin e palës së tretë.
Por drama nuk ndalet këtu. Një tjetër pikë që ndezi reagime ishte çështja e çmimeve të shërbimeve të saj. Në shumë portale qarkulluan shifra marramendëse: deri në 6 mijë paund për një program tre-mujor, ose 8 mijë dollarë. Këto lajme bënë që shumë ndjekës të ndiheshin të manipuluar, duke e akuzuar se shfrytëzon njerëzit në nevojë emocionale për përfitime të mëdha financiare.
Rrjetet shpërthyen me akuza të ashpra: “hipokrite”, “manipuluese”, “guru mashtruese”. Debati u përhap globalisht, me shumë ekspertë të marrëdhënieve online që dolën hapur kundër saj, duke e përdorur si shembull të rrezikut nga industrinë e pakontrolluar të coaching-ut.
Përballë një uragani të tillë, Sadia nuk qëndroi më në heshtje. Në një reagim në Instagram, ajo mohoi gjithçka. Së pari, ajo sqaroi se tarifat që po qarkullonin ishin të pavërteta: “Tarifa ime është 500 dollarë për orë, jo 6 mijë apo 8 mijë dollarë”, tha ajo. Së dyti, u shpreh kategorike për akuzat e tradhtisë: “Asnjë burrë i fejuar nuk ka dalë ndonjëherë të thotë diçka të tillë, sepse nuk ka pasur kurrë asgjë. Është thjesht një shpifje.” Dhe e mbylli me një fjali të shkurtër por sfiduese: “Tani le të kthehemi te puna!”.
Megjithatë, dëmi tashmë ishte bërë. Imazhi i saj, i ndërtuar me kujdes si figurë e besueshme dhe si “high-value coach”, është rrënuar nga akuzat për dyfytyrësi. Publiku nuk po e fal lehtësisht: për shumëkënd, ky është momenti kur perdet ranë dhe u pa e vërteta e një industrie ku shpesh premtimet janë më të mëdha se realiteti.
Sot, Sadia Khan është më e përfolura se kurrë. Për një pjesë, ajo mbetet një viktimë e thashethemeve dhe shpifjeve. Për të tjerët, është simboli i hipokrizisë së atyre që shesin moral ndërsa vetë jetojnë krejt ndryshe. Por një gjë është e sigurt: ky skandal i ka dhënë fund iluzionit të saj të paprekshmërisë dhe ka vënë në pikëpyetje vetë industrinë që përfaqëson.