Opinion publik në Fier është ende i tronditur nga ngjarja e rëndë e ab*zimit ndaj një vajze të mitur në Patos, ku babai 36-vjeçar është arrestuar si i dyshuar.
Në një intervistë ekskluzive për Top Channel, nëna e 12-vjeçares ka rrëfyer se nuk kishte asnjë dijeni rreth ab*zimit dhe se për herë të parë është përballur me rrëfimet e vajzës në komisariatin e policisë.
“Vajza tregonte që ‘babai më prekte dhe më kapte’. Më ra si bombë se nuk kisha parë gjë me sytë e mi. Para syve të mi nuk ka ndodhur asgjë, prapa krahëve të mi nuk di gjë. Burri ikën në 6 të mëngjesit, vjen 6 pasdite. Ai e mbante shtëpinë. Nuk kam parë gjë me sytë e mi, në komisariat i dëgjova këto. Kam 13 vite e martuar me të. I thashë pse ma bëre këtë, të kam dhënë 7 fëmijë, 7 yje,” ka deklaruar e tronditur nëna.
Ajo ka treguar se nuk ka pasur mundësi të flasë ende me vajzën e saj. Në lidhje me fëmijët e tjerë, nëna ka shpjeguar se bashkëshorti i saj i ka të ndarë prindërit dhe ajo u ka thënë fëmijëve se babai ka ikur në Gjermani. Ajo gjithashtu ka shprehur shpresën se nëse bashkëshorti i saj e ka pranuar fajin, ai duhet të marrë dënimin maksimal dhe “të kalbet në burg”.
E dëshpëruar, ajo ka shtuar se po ta dinte për ab*zimin, do të kishte reaguar menjëherë për të mbrojtur vajzën e saj. Në fund, nëna e 12-vjeçares ka bërë një apel të fortë për ndihmë nga shteti për veten dhe shtatë fëmijët e saj në këtë situatë të vështirë.