Fitorja e demokratëve në të dyja dhomat e Kongresit amerikan mund të sjellë më shumë angazhim në Ballkanin Perëndimor, vlerësojnë ekspertët e intervistuar nga Radio Evropa e Lirë. Ata këshillojnë që Kosova të mos presë ndryshime të mëdha së shpejti.
Robin Brooks, ish-zyrtare e Këshillit për Siguri Kombëtare të SHBA-së, thotë se Kongresi i ri, që nis punën në janar, fillimisht do të përqendrohet te çështjet e brendshme. Sipas saj, ligjvënësit mund t’i kërkojnë llogari administratës për veprime që bien ndesh me “ligjet, vlerat dhe normat amerikane”. Nën shqyrtim mund të vihet edhe mënyra se si Uashingtoni i kërkon Kosovës bashkëpunim për dëbimet nga SHBA-ja.
Edward P. Joseph, profesor në Universitetin Johns Hopkins, pret që Kongresi ta shqyrtojë më nga afër politikën e administratës Trump ndaj Serbisë, ku Lista Studentore fitoi zgjedhjet e 25 tetorit. Ai i kërkoi Albin Kurtit të rishikojë qasjen ndaj komunitetit serb:
“Kurti ka një mundësi të rrallë për të marrë iniciativën dhe për të propozuar politika të reja që do të përmirësonin marrëdhëniet si me serbët e Kosovës, ashtu edhe me Serbinë. Nga ana tjetër, nëse vazhdon me qasjen aktuale, Kosova do të përballet me presion dhe kritika më të mëdha”, thotë Joseph për REL-in.
Ish-ambasadori amerikan Daniel Fried sheh mundësi për “diplomaci më kreative” dhe bashkëpunim më të ngushtë mes SHBA-së dhe Evropës për integrimin evropian të Serbisë. “Nuk do të prisja një nismë të madhe së shpejti”, thotë ai.
“Kosova duhet të mbështetet edhe më shumë te parimet e saj themeluese: demokracia, sundimi i ligjit dhe flamuri i saj (i mrekullueshëm), që e përfaqëson Kosovën si shtet për të gjithë ata që jetojnë në të”, thotë Fried.
Brooks kritikoi përqendrimin e Kosovës te administrata aktuale amerikane. “Përpjekja për t’i bërë qejfin administratës Trump ishte gabim që nga fillimi”, thotë ajo.
“Kosova duhet të kërkojë të ardhmen e saj evropiane dhe të angazhohet me të dyja partitë në Dhomën e Përfaqësuesve dhe në Senat”, thotë Brooks.
Sipas saj, ligjvënësit amerikanë mund të ndihmojnë në bindjen e Spanjës, Greqisë, Rumanisë, Qipros dhe Sllovakisë që të njohin pavarësinë e Kosovës.