Ambasada Britanike ka shprehur shqetësim se ndryshimet e propozuara në Ligjin për Dhomat e Specializuara mund të dëmtojnë marrëdhëniet e Kosovës me partnerët ndërkombëtarë. Ajo i ka bërë thirrje Kuvendit të zhvillojë konsultime të mëtejshme para se ta votojë sërish projektligjin.
“Mbretëria e Bashkuar ka marrë shënim për synimin e Kuvendit të Kosovës që të votojë sërish për ligjin që ndryshon dhe plotëson Ligjin për Dhomat e Specializuara.
Ne kemi shqetësimin se ndryshimet e propozuara nuk do t’u shërbejnë interesave thelbësore të Kosovës dhe do të dëmtojnë marrëdhëniet e saj me partnerët dhe mbështetësit ndërkombëtarë.
Kemi marrë plotësisht parasysh reagimet dhe ndjenjat e forta të krijuara pas aktgjykimeve të fundit. Besojmë se qëllimet e Kosovës mund të arrihen më së miri duke siguruar që vendi të vazhdojë të respektojë zotimet e tij ndërkombëtare dhe përkushtimin ndaj llogaridhënies, drejtësisë dhe sundimit të ligjit.
Ne inkurajojmë Kuvendin që të marrë kohën e nevojshme për konsultime të mëtejshme, si brenda vendit, ashtu edhe me Bashkimin Evropian dhe aleatët e tjerë ndërkombëtarë, në mënyrë që të gjendet një zgjidhje më e mirë.”