Gjithçka nisi në vitin 2003, në Gjilan. Ajo ishte police shqiptare, ai polic gjerman në mision në Kosovë. Një njohje mes kolegësh u shndërrua në dashuri, që i bashkoi për gjithë jetën.
Pas misionit në Kosovë, Thorsten vazhdoi karrierën në Policinë Gjermane. Punoi në Zyrën Shtetërore të Policisë Kriminale (LKA), u avancua në detyrë dhe u specializua në fushën e teknologjisë informative.
Në vitin 2007, dashuria e Ganimetes dhe Thorstenit u plotësua me ardhjen në jetë të vajzës së tyre, Aurela. Ajo u bë qendra e familjes së tyre, ku dashuria dhe traditat shqiptare kishin gjithmonë vend të veçantë.
Për Thorstenin, Kosova nuk ishte vetëm vendi ku kishte nisur dashuria. Ajo u bë atdheu i tij i dytë. Këtu kishte miq, familje dhe një shtëpi ku ëndërronte të jetonte pas pensionimit, së bashku me Ganimeten.
Më 26 shtator 2026, Thorsten pësoi arrest kardiak. Tri ditë më vonë ndërroi jetë. Dëshira e tij kishte qenë të varrosej në Kosovë. Më 1 tetor, Ganimete ia përmbushi amanetin: Thorsten u varros në Gjilan, qytetin ku kishte nisur historia e tyre e dashurisë.