Gazetari Artan Hoxha ka deklaruar dje se dokumentarët që ai ka realizuar për ngjarjen e 21 Janarit 2011, ku gjatë protestës së opozitës së kohës para Kryeministrisë, mbetën të vrarë katër protestues të pafajshëm dhe u plagosën qindra të tjerë, kanë luajtur një rol kyç në zbardhjen e ngjarjes.
Sipas tij, pamjet e transmetuara nga ky televizion kanë dokumentuar në mënyrë të saktë se protestuesit ishin vrarë nga gardistët, duke hedhur poshtë akuzat e qeverisë së kohës, që pretendonte se ata mund të ishin vrarë nga radhët e veta. Hoxha theksoi se, ndonëse Rama kishte mbështetje nga media të tjera, “News 24” ishte media që raportoi pa pasur dyshime dhe me një cilësi të lartë. Ai shtoi se këto pamje kanë qenë shpëtimtare për kryeministrin aktual, pasi mund të kishte përfunduar në burg për shkak të akuzave të forta.
“Unë tek News 24 kam bërë dokumentare për 21 janarin. Dokumentarët kanë qenë të një cilësie tepër të mirë dhe kanë dokumentuar saktë se çfarë ndodhi atë ditë. Ndërsa, kishte akuza nga qeveria se protestuesit mund të ishin vrarë nga radhët e veta. Por, News 24 dokumentoi se vrasjet ishin bërë nga gardistët dhe se ishte qëlluar nga brenda Kryeministrisë. Rama ka pasur edhe media të tjera që e kanë mbrojtur, por këtë gjë nuk është se e kanë bërë, nuk e di arsyen, por News 24 në atë kohë raportoi në mënyrë të shkëlqyer këtë ngjarje, duke qenë kështu ato pamje shpëtimtare edhe për vetë kryeministrin e sotëm, pasi përndryshe mund të ishte arrestuar”, deklaroi dje Hoxha teksa ishte i ftuara në një studio televizive.
Retrospektivë
Katërmbëdhjetë vjet nga makthi i përjetuar prej të gjithë shqiptarëve
Prokuroria – Ndrea Prendi dhe Agim Llupo qëlluan njëkohësisht dhe drejtpërdrejt mbi protestuesit, ndërkohë që veprimi u pasua edhe nga qitje të tjera.
Katërmbëdhjetë vjet më parë, 21 janari dukej si një makth që nuk mund të na ndodhte sërish ne, nuk mund t’i ndodhte shqiptarëve. Gjithçka ishte e pabesueshme. Turmat e irrituara thërrisnin për drejtësi. Ato shoqëroheshin me britma, vrapime me panik dhe kthime sërish para Kryeministrisë. Skenat transmetoheshin direkt në të gjitha televizionet, por tmerri dhe paniku ishte më i madh tek ata që ishin në shesh, tek demonstruesit. Dhe më pas…, në kohën kur njerëzit po largoheshin e mendohej se gjithçka mbaroi, të shtënat tmerruan demonstruesit.
Pastaj, një njeri u shtri përtokë, pas tij një i dytë, ndërsa dikush nga mesi i turmës thirri me zë të lartë: “Na vranë”. Trupi i një 40-vjeçari u mor në krahë nga disa burra, ndërkohë që në gjoks i dukej një vrimë plumbi, pasi këmishën e kishte gjysmë të zbërthyer. “Po na qëllojnë me plumba të vërtetë”, tha një tjetër. E ashtu ndodhi, atë ditë u vranë tre demonstrues, Ziver Veizi, Hekuran Deda dhe Faik Myrtaj. Pak ditë më vonë ndërroi jetë në spital edhe Aleks Nika, i cili kishte marrë një plumb në kokë. U filmuan edhe nga kamerat e televizioneve. Bashkë me ta u plagosën dhjetëra të tjerë, por disa patën frikë të deklarojnë veten nga tmerri që përjetuan pas protestës nga dhuna policore.
Protesta në bulevard
21-janar 2011- Gjithçka nisi rreth orës 14:00, kur protestuesit përshkuan rrugën në këmbë nga sheshi “Skënderbej” deri para godinës së Kryeministrisë, pasi policia kishe marrë masat që të mos lejonte asnjë autobus të vazhdonte më tej. Turma nisi me thirrje kundër Kryeministrit, ndërkohë që vetëm pak minuta më vonë, filloi përplasja me forcat e policisë, të vendosura në mbrojtje të Kryeministrisë në pjesën e jashtme të saj.
Rreth orës 14:30, duke vënë re përshkallëzimin e demonstratës, efektivët e Gardës së Republikës, të cilët mbronin ambientet e brendshme të Kryeministrisë janë shtuar në oborr. Demonstruesit, të irrituar nga ky veprim, kanë hedhur drejt efektivave të Gardës sende të forta si gurë, pllaka trotuari, pllaka mermeri, si dhe u është vënë zjarri pemëve që ndodheshin në pjesën përpara Kryeministrisë.
Gjatë kësaj kohe, nga ana e efektivëve të Gardës, me mjetet që ata dispononin, është hedhur një lloj gazi që vështirësonte frymëmarrjen dhe kordoni i forcave policore jashtë perimetrit rrethues të objektit është çorientuar, duke braktisur vendet e shërbimit, ndërkohë që kishin marrë plagë për shkak të përplasjes me demonstruesit. Në këtë kohë, protestuesit kanë hipur në kangjellat e murit rrethues të Kryeministrisë, por pa tentuar që të futeshin brenda saj.
Sulmet ndaj Gardës
Me ndërhyrjen e disa personave civilë, pjesëmarrës në demonstratë, si Zyhdi Dajti, nga thirrjet me megafon të gardës dhe thirrjet me zë të lartë nga efektivët në terren, të cilët u kërkonin largimin nga objekti demonstruesve dhe pas kalimit të automjeteve shihedhëse, një pjesë e demonstruesve janë larguar nga sheshi para Kryeministrisë për të kaluar nga ana e Piramidës. Një pjesë e demonstruesve, pasi kanë hipur edhe në lartësi të Piramidës, kanë filluar të godasin me pllaka guri, pllaka trotuari, gurë e molotov, jo vetëm efektivët e Gardës, që ndodheshin në sektorin verior, por edhe Kryeministrinë, pasi aty nuk kishte më efektivë policie, por gjithsesi ajo ishte e mbyllur dhe e padëmtuar.
Nga sulmet masive me mjete të forta, shumë efektivë të Gardës me shërbim, kanë pësuar dëmtime fizike, të parrezikshme për jetën dhe pas një mjekimi ambulator në pjesën më të madhe, ata janë kthyer përsëri duke rimarrë pozicionet sipas planit të masave. Goditjet me mjete të forta ndaj efektivëve të Gardës, kanë vijuar nga dy krahët, si nga bulevardi ashtu edhe nga Piramida, ku intensiteti i goditjeve ka ardhur duke u shtuar. Në ato momente, një pjesë e demonstruesve, duke përfituar nga fakti që forcat policore ishin larguar nga vendi i tyre i shërbimit, kanë vepruar me forcë për të hapur portën e Kryeministrisë dhe pasi porta u hap duke u shqyer dryni i zinxhirit lidhës, një grup prej tyre kanë tentuar të futen brenda në objekt.
Të shtënat në ajër
Në këtë moment, Garda ka bërë thirrje për të shpërndarë demonstruesit, por turma e protestuesve nuk është larguar. Ata kanë vijuar të qëllonin me mjete e sende të forta ndaj tyre. Fillimisht është hapur zjarr në ajër me fishekë manovre, ndërsa pak minuta më vonë, Garda nisi të qëllojë me fishekë luftarakë, po në ajër. Në këtë moment, grupi i njësisë speciale, i pajisur me mjetet teknike të posaçme, është afruar nga mesi i rrugës për tek porta e Kryeministrisë, duke ndërhyrë forcërisht me shkopinj gome e mburoja, e duke arritur që të nxjerrin jashtë portës grupin e personave, që kishin mundur të futeshin pak metra brenda rrethimit të Kryeministrisë. Megjithatë, Garda nuk e ka mbyllur portën.
Vrasjet në bulevard
Për shkak të goditjeve që kishin pësuar nga sulmi i protestuesve, Garda kishte humbur pozicionin e vet, duke krijuar hapësira mes efektivëve dhe protestuesve, të cilët ndodheshin jashtë rrethimit të Kryeministrisë. Ora shënonte 16:10. Në atë moment, të shtëna armësh janë dëgjuar nga brenda territorit të Kryeministrisë, ku më vonë, sipas prokurorisë, u vërtetua se qëlluan drejtpërdrejt dhe njëkohësisht Ndrea Prendi dhe Agim Llupo.
Ky veprim është pasuar edhe nga qitje të tjera, të realizuara nga efektivët e grupit të zjarrit në Gardën e Republikës. Si pasojë e predhave të qitura nga armët e zjarrit humbën jetën Ziver Veizi, Hekuran Deda dhe Faik Myrtaj. Veç tyre u plagosën edhe shtatë persona, mes të cilëve, gazetari Fatos Mahmutaj dhe Aleks Nika. Ky i fundit, pas mjekimit paraprak në Spitalin Ushtarak të Tiranës, është dërguar për kurim të mëtejshëm në Turqi, ku dhe vdiq pas disa ditësh. Ngjarja u filmua nga dhjetëra stacione televizive, të cilët duke pasqyruar me profesionalizëm, pse jo dhe me guxim detajet më të imta të zhvillimeve të saj, ndihmuan jo pak për të vërtetën, për atë të vërtetë, për të cilën janë të gjithë të interesuar të jepet drejtësi.
Deklarata/ Berisha, pas vrasjeve: Puç, me çadra-pistoletë
Pas protestës ku mbetën të vrarë katër persona, menjëherë erdhën edhe akuzat e ndërsjella mes forcave politike. Pa vonuar shumë, Kryeministri Sali Berisha doli në konferencë për shtyp, duke deklaruar se donin t’i bënin puç, ndërkohë që opozita u shpreh se shteti, nëpërmjet segmenteve të Gardës së Republikës dhe Policisë së Shtetit, ka vrarë katër qytetarë të pafajshëm shqiptarë dhe ka mbytur në gjak një demonstrim paqësor, që është e drejtë kushtetuese e qytetarit.
Partia Socialiste akuzoi si urdhërues të vrasjeve Kryeministrin dhe ministrin e Brendshëm. Por, Kryeministri nuk u ndal vetëm me akuzat për PS-në, ai sulmoi ashpër Prokurorinë, SHISH-in dhe Presidentin e Republikës, të cilët, sipas tij, donin ta rrëzonin me dhunë. Në deklarata publike, nga foltorja e Kryeministrisë, apo edhe nga takimet me gardistë dhe policë, ai pohoi se gjithçka ka qenë e organizuar dhe për këtë ngjarje, kanë bashkëpunuar një sërë personash. Sipas tij, rol aktiv e kishte edhe prokuroria shqiptare, me në krye Ina Ramën, e cila, me bashkëpunëtorët e saj, urdhëroi ndalimin e drejtuesve të Gardës së Republikës.
Madje, që natën e parë, Berisha tha se sulmi ishte i mirorganizuar, ku u përdorën çadra-pistoletë. Gjithashtu, Kryeministri theksoi se SHISH-i nuk kishte bërë punën e tij dhe nuk i kishte dhënë asnjë informacion në lidhje me demonstratën e dhunshme që do të mbahej më 21 janar. “Të gjitha agjencitë e huaja mike, kishin shprehur shqetësim për atë çfarë do të ndodhte në vend në datën 21. Por as në datën 20, SHISH-i nuk tregoi asnjë gjë për ngjarjen në raportin e përgatitur për mua.
Në këto rrethana, mund të them se SHISH nuk i ka dhënë të dhëna Policisë dhe për këtë ju ftoj të ngremë një komision parlamentar”, tha Berisha. Sipas tij, një grup protestuesish ishin të pajisur me mjete të forta dhune, kishin konsumuar edhe lëndë narkotike dhe madje kishin në duar dhe sulmuan me bomba molotov ndaj forcave të policisë dhe Gardës së Republikës dhe skenari ishte të merrej Kryeministria, ndërtesa e Parlamentit, e televizionit dhe e ndonjë ministrie.